Aðalsíða

  Algengar spurningar

  Næsta byrjendanámskeið?

30.12.04

Karatefólk ársins 2004 Sólveig Sigurðardóttir og Jón Ingi Þorvaldsson hafa verið útnefnd karatekona og karatemaður ársins. Þetta er í annað sinn sem Sólveig verður fyrir valinu en Jón Ingi hlýtur nú þessa nafnbót þriðja árið í röð og er þetta einnig þriðja árið í röð sem Karatefélagið Þórshamar á bæði karatekonu og karatemann ársins. Sólveig varð unglingameistari í sínum flokkum í bæði kata og kumite á árinu eins og mörg undanfarin ár og vann sinn fyrsta Íslandsmeistaratitil í kata kvenna auk þess sem hún var í sigurliði Þórshamars í hópkata. Hún vann bikarmeistaratitil KAÍ og var í sigurliði Þórshamars í liðakeppninni á Íslandsmótinu í kumite. Á erlendum vettvangi náði hún einnig góðum árangri en hún vann til bronzverðlauna í flokki 18-20 ára kvenna á alþjóðlegu kata móti í Stokkhólmi auk þess að vinna til tvennra bronzverðlauna á Bohemia Cup í Prag, í opnum flokki og liðakeppni kvenna. Jón Ingi varð á árinu Íslandsmeistari í liðakeppni í Kata, Íslandsmeistari í -80 kg. flokki í kumite og liðakeppni í kumite. Auk þess varði hann Bikarmeistaratitil Karatesambands Íslands þriðja árið í röð og vann til tvennra verðlauna á alþjóðlega mótinu Bohemia Cup í Prag, bronzverðlaun í opnum flokki karla í kumite og silfurverðlaun í liðakeppni karla ásamt liði Dana. Viðurkenningarnar voru veittar við hátíðlega athöfn 29.des. sl. og var meðfylgjandi mynd tekin við það tækifæri. Við óskum Sólveigu og Jonna til hamingju með árangurinn á árinu og vonum að þessi viðurkenning verði þeim hvatning til enn frekari afreka á árinu sem er að ganga í garð.

18.12.04

Sensei Kase er látinn Sensei Taiji Kase, 9.dan, lézt 24. nóvember sl., 75 ára að aldri. Hann var einn af þeim fáu sem eftir eru af "fyrstu kynslóð" JKA meistaranna sem hófu karate iðkun sína á fimmta áratugnum undir stjórn Sensei Gichin Funakoshi og sonar hans Yoshitaka. Fáir hafa haft jafn mikil áhrif á þróun Shotokan Karate og Sensei Kase en hann hafði mjög sérstakan stíl og fór jafnan sínar eigin leiðir. Hér má finna nokkrar síður með nánari upplýsingum um þennan merka meistara: Tribute to Sensei Kase - a JKA pioneer The influence of Sensei Kase on modern Shotokan Karate Kase, Imprint of a master - interview Stutt æfiágrip af vef English Shotokan Academy

16.12.04

Sigursælir unglingar Tvö unglingamót fóru fram í desember, seinni hluti Shotokanmótsins fór fram 4.des. og Reykjavíkurmót barna og unglinga þann 11.des. Þórshamar átti að venju öflugt lið á báðum mótunum. Okkar fólk sópaði að sér flestum verðlaunum á kumite hluta Shotokanmótsins en þar unnu Jón Ingvi Seljeseth, Ingibjörg Helga Arnþórsdóttir og Tómas Lee Róbertsson til gullverðlauna. Aðrir sem unnu til verðlauna úr Þórshamri voru Arnljótur Björn Halldórsson, Bjartur Guðlaugsson, María Helga Guðmundsdóttir og Margeir Stefánsson. Á Reykjavíkurmótinu var það hins vegar KFR sem vann til flestra verðlauna. Þar vann Ingibjörg Helga til tvennra gullverðlauna, bæði í kata og kumite, Jón Ingvi sigraði í sínum flokki í kata og aðrir sem unnu til verðlauna úr okkar röðum voru Breki Bjarnason, Aron Þór Ragnarsson, Steinar Valur Bjarnason og Bjarki Mohrmann. Við óskum þeim innilega til hamingju með árangurinn á mótum haustsins. Meðfylgjandi mynd er af verðlaunahöfum á Shotokanmótinu. Smellið á myndina til að skoða myndir sem teknar voru á mótinu. Úrslit allra móta eru nú komin inn á úrslitasíðuna.

6.12.04

Æfingar í desember Nokkrar breytingar verða á æfingum í desember. Þessar breytingar má sjá í sérstakri æfingatöflu fyrir þrjár síðustu vikur ársins. Síðustu æfingar í barna- og unglingahópum verða á föstudaginn 10.des. og lokahóf þeirra hópa verður síðan á sunnudag þegar farið verður í keilu með barnahópana kl. 14:00 og unglingahópana kl. 15:30. Miðar í keiluna verða seldir í afgreiðslu félagsins fram til föstudags og kosta kr. 700. Innifalið er einn leikur í keilu, pizza og gos. Hið árlega jólaglögg verður síðan laugardaginn 18.des. en það er að venju aðeins fyrir 18 ára og eldri.

Eldri fréttir...

powered by blogger