Góður árangur á Swedish Kata Trophy
Swedish Kata trophy mótið (Kata Pokalen) fór fram um helgina í Stokkhólmi. Þetta er sterkt katamót þar sem um 500 keppendur frá 9 löndum tóku þátt. Sex keppendur fóru út á vegum Karatesambands Íslands, og stóðu sig öll með mikilli prýði.
Vilhjálmur Svan Vilhjálmsson úr KFR keppti í flokki fullorðinna. Í fyrstu umferð beið hann lægri hlut fyrir finnanum Jusso Kenkkilä. Hann fékk hinsvegar uppreisn, og sigraði þar í þremur viðureignum í röð og lenti í þriðja sæti.
Auður Olga Skúladóttir, Þórshamri, keppti í flokki 18-20 ára og komst í úrslit. Þar tapaði hún fyrir Vanessu Gutierrez frá Svíþjóð, og hlaut silfur. Vanessa keppti einnig í flokki fullorðinna og hlaut þar silfurverðlaun.
María Helga Skúladóttir, einnig úr Þórshamri, keppti í flokki 16-17 ára. Hún vann 3 viðureignir en tapaði í úrslitum og hlaut silfur.
Guðbjartur Ísak Ásgeirsson úr Karatedeild Hauka hlaut brons í flokki 15 ára, en hann tapaði í þriðju umferð fyrir Reece Taylor sem vann flokkinn.
Daníel Pétur Axelsson og Margeir Stefánsson, báðir úr Þórshamri, lentu á móti sterkum andstæðingum í fyrstu umferð og komust ekki áfram.
Ásmundur Ísak Jónsson fór með sem þjálfari og fararstjóri en hann hefur séð um að undirbúa hópinn fyrir mótið. |