Nýr vefur!

  Næsta byrjendanámskeið?

  Algengar spurningar

31.01.2005

Ísland 7 - Noregur 4 Landslið Íslands og Noregs áttust við í vináttulandsleik í Borgarleikhúsinu laugardaginn 29. janúar eftir sameiginlegar æfingabúðir liðanna með landsliðsþjálfara okkar, Allan Busk. Keppnin var æsispennandi og umgjörðin öll hin glæsilegasta eins og sjá má af meðfylgjandi myndum. Keppnin var með nokkuð óvenjulegu sniði og voru viðureignir m.a. hafðar styttri en venjulega til að hægt væri að ná tveimur umferðum. Fyrir Íslands hönd kepptu þau Edda Blöndal, Sólveig Sigurðardóttir, Auður Olga Skúladóttir, Jón Ingi Þorvaldsson, Ingólfur Snorrason og Andri Sveinsson. Edda og Auður sigruðu í báðum sínum viðureignum og Sólveig, Andri og Ingólfur lönduðu einum sigri hvert. Niðurstaðan var sannfærandi sigur á geysisterku liði Norðmanna og sýnir að landslið okkar er í mikilli sókn. Sjá nánar á vef KAÍ, www.kai.is

28.01.2005

Ný stjórn Þórshamars Aðalfundur Þórshamars var haldinn miðvikudaginn 26. janúar 2005. Á fundinum var m.a. kosin ný stjórn félagsins en hana skipa: Jón Ingi Þorvaldsson, formaður Birkir Björnsson, varaformaður Atli Steinn Guðmundsson, ritari Gréta Gunnarsdóttir, gjaldkeri Jóna Björg Howard, meðstjórnandi Árni Þór Jónsson, varamaður Bylgja Guðmundsdóttir, varamaður Sigríður Perla Thorsteinson ákvað að draga sig í hlé frá stjórnarstörfum vegna náms sem hún stundar um þessar mundir. Perla hefur verið gjaldkeri félagsins um árabil og hefur lagt gríðarlega mikið af mörkum til félagsins með óeigingjörnu og ötulu starfi sínu. Við þökkum henni kærlega fyrir samstarfið og óskum henni góðs gengis í náminu. Á fundinum var einnig kosin skemmtinefnd félagsins en meginverkefni hennar er að skipuleggja árshátíð félagsins sem haldin verður þann 12.mars nk. Í skemmtinefndinni eru Atli Steinn Guðmundsson, Jóna Björg Howard, Katrín María Lehmann og Steinar Valdimar Pálsson.

27.01.2005

Landsliðsæfingar með Allan Busk Allan Busk, landsliðsþjálfari okkar, kemur í heimsókn um helgina og verður með sameiginlegar æfingar með landsliðum Íslands og Noregs. Dagskráin um helgina verður eftirfarandi: Föstudag kl. 20:15 í Þórshamri (14 ára og eldri) Laugardag kl. 10:00 í KFR, Laugardal (9-14 ára) Laugardag kl. 16:00 í Þórshamri (14 ára og eldri) Sunnudag kl. 10:00 í Þórshamri (14 ára og eldri) Æfingarnar á föstudag kl. 20:15 og á laugardag kl. 16:00 verða með norska landsliðinu og eru einkum ætlaðar þeim sem hafa einhverja reynslu af keppni. Æfingin á sunnudagsmorgun er hins vegar fyrir alla sem hafa áhuga og athugið sérstaklega að á laugardag kl. 10:00 er sérstök æfing fyrir yngstu kynslóðina. Hápunktur helgarinnar verður að sjálfsögðu vináttulandsleikur Íslands og Noregs sem fram fer í Borgarleikhúsinu á laugardag kl. 13:00 og hvetjum við alla til að koma og fylgjast með þessum stórviðburði. Meðfylgjandi eru myndir sem teknar voru á landskeppni við Dani sem fram fór fyrir ári síðan.

25.01.2005

Stelpurnar okkar í sérflokki í Crystal Palace Unglingalandslið okkar í karate tók þátt í opnu bresku unglingamóti í Crystal Palace nú um helgina. Liðið var skipað þeim Sólveigu Sigurðardóttur og Ingibjörgu Helgu Arnþórsdóttur úr Þórshamri, Andra Sveinssyni úr Fylki, Gunnari Nelson úr KFR og Alvin Zogu og Diego Birni Valencia úr Víkingi. Þau náðu góðum árangri á mótinu en heildarfjöldi keppenda á mótinu var hátt á annað þúsund. Stelpurnar tóku þátt í liðakeppni 16-20 ára og fengu þar til liðs við sig dönsku landsliðsstúlkuna Mathilde Klint, en hún er ein af þeim sem komu hingað í heimsókn í janúar í fyrra þegar danska landsliðið atti kappi við það íslenska. Stelpurnar byrjuðu á því að slá út breskt félagslið og áttu síðan í höggi við mjög sterkt belgískt lið í undanúrslitum sem þær unnu sannfærandi sigur á. Í úrslitum töpuðu þær síðan naumlega fyrir bresku liði, Western Karate Union. Sólveig Sigurðardóttir keppti í -60 kg. flokki juniora, eða 18-20 ára unglinga. Þar mætti hún hinni dönsku Mathilde Klint í fyrstu viðureign sinni og vann hana með yfirburðum. Í undanúrslitum tapaði hún naumlega fyrir breskri stúlku sem síðan vann flokkinn. Sólveig keppti síðan um 3ja sætið og valtaði yfir andstæðing sinn þar með átta stiga mun og tryggði sér bronzverðlaun í sínum flokki. Andri Sveinsson vann fyrstu viðureignina í sínum flokki, -75 kg. flokki juniora, en tapaði naumlega í annari umferð, 0-1. Strákarnir tefldu síðan fram liði í liðakeppni 16-20 ára. Þeir stóðu sig ágætlega þar og töpuðu mjög naumlega 2-3 í fyrstu umferð. Jón Ingi Þorvaldsson, landsliðsmaður til margra ára, var með í för sem þjálfari og fararstjóri. Smellið á myndina hér til hliðar til að skoða myndir frá mótinu.

24.01.2005

Þrenn gullverðlaun á meistaramóti barna Meistaramót barna í kata fór fram í gær í íþróttahúsinu Austurbergi. Rúmlega 200 börn og unglingar voru skráð til þátttöku á mótinu, þar af rúmlega 50 úr okkar röðum. Keppnislið okkar landaði þrennum gullverðlaunum á mótinu og varð Þórshamar í þriðja sæti þegar stig hvers félags voru talin saman að móti loknu. Breki Guðmundsson sigraði í flokki f.1997-1999, Breki Bjarnason í flokki f. 1994 og lið þeirra Breka Bjarnasonar, Mikaels Luis og Arons Þórs sigraði í hópkata f. 1994-1995. Við óskum þeim til hamingju með glæsilegan árangur!

18.01.2005

Ísland - Noregur ! Norska landsliðið í Karate kemur í heimsókn til okkar síðustu helgina í janúar til æfinga með íslenska landsliðinu og verður haldin keppni á milli liðanna í Borgarleikhúsinu laugardaginn 29. janúar kl. 13:00. Hvor þjóð teflir fram sex manna liði í kumite og þeir sem keppa fyrir Íslands hönd verða: Edda Blöndal, Þórshamri Sólveig Sigurðardóttir, Þórshamri Auður Olga Skúladóttir, Þórshamri Jón Ingi Þorvaldsson, Þórshamri Ingólfur Snorrason, Fylki Andri Sveinsson, Fylki Forsala aðgöngumiða er hafin og eru allir hvattir til að krækja sér í miða í afgreiðslunni í Þórshamri áður en þeir seljast upp! Ekki missa af þessum einstaka viðburði! Síðast komust mun færri að en vildu! Allan Busk, landsliðsþjálfari okkar, verður einnig með sameiginlegar æfingar fyrir norska og íslenzka landsliðið um helgina og eru þær æfingar opnar öllum sem hafa áhuga á að æfa fyrir keppni í kumite.

16.01.2005

Aðalfundur Þórshamars Aðalfundur félagsins verður haldinn miðvikudaginn 26.janúar og hefst hann kl. 20:30 Á dagskrá verða venjuleg aðalfundarstörf skv. lögum félagsins: Skýrsla stjórnar Endurskoðaðir reikningar lagðir fram Umræður um skýrslu stjórnar og reikninga. Reikningar bornir undir atkvæði Lagðar fram tillögur að breytingum laga og reglugerða félagsins, ef um er að ræða Önnur mál Kosning stjórnar og endurskoðanda Æfing I.lokks fellur niður kl. 20:15 og verður sameiginleg æfing hjá I.flokk og M.flokk kl. 19:00-20:15

02.01.2005

Byrjendanámskeið að hefjast! Gleðilegt nýtt ár! Byrjendanámskeiðin eru hafin og verður tekið við nýliðum fram til fimmtudagsins 27.janúar. Æfingar í byrjendahóp fullorðinna verða á þriðjudögum og fimmtudögum kl. 21:00 og á laugardögum kl. 14:00. Æfingar í byrjendahóp barna (6-9 ára) verða á fimmtudögum kl. 17:20 og á laugardögum kl. 9:20 og byrjendahópur unglinga (10-14 ára) æfir á fimmtudögum kl. 18:10 og á laugardögum kl. 10:10. Boðið er upp á ókeypis kynningartíma fyrir þá sem vilja. Hér má finna nánari upplýsingar um æfingatíma og verð. Skráið ykkur hér til að tryggja ykkur pláss á byrjendanámskeiðinu sem er að hefjast.

Eldri fréttir...