|
 |
| | Næstu byrjendanámskeið hefjast í byrjun janúar 2005. Sláðu inn netfangið þitt í reitinn hér að neðan og við sendum þér tölvupóst um áramótin til að minna þig á það...
| |
|
|
|
|
| |
28.11.04
|
Fréttir frá HM
HM í Karate lauk sl. sunnudag og eins og fram hefur komið voru þau Edda og Jón Ingi úr Karatefélaginu Þórshamri meðal keppenda.
Á laugardeginum kepptu þau bæði í opnum flokkum og sigraði Edda fyrsta mótherja sinn þar 3-0 en það var fulltrúi Botswana. Í annari umferð mætti hún þýsku stúlkunni Nadine Ziemer, tvöföldum Evrópumeistara. Ziemer sigraði með aðeins einu stigi í framlengingu og fór síðan í úrslit þannig að Edda fékk uppreisnarviðureign. Þar átti hún í höggi við Ástralann K.Mah og fór sú viðureign einnig þannig að Edda tapaði naumlega í framlengingu. Á meðfylgjandi mynd má sjá hvar Edda skorar fyrsta stigið í þeirri viðureign. Báðar viðureignir voru mjög jafnar og spennandi og má segja að Edda hafi sýnt og sannað að hún er að komast í röð þeirra allra fremstu í heiminum.
Jón Ingi mætti Finnanum E. Luukka og byrjaði áægætlega og náði tveggja stiga forystu á fyrstu mínútunni en viðureignin endaði síðan 7-2 Finnanum í vil. Hann komst því ekki lengra í opna flokknum.
Síðan keppti Edda í sínum þyngdarflokki, +60kg. flokki, á sunnudeginum og Jonni í -75kg. flokki. Edda náði sér ekki á strik í sinni fyrstu viðureign og var langt frá sínu besta er hún mætti U.Kaspulatova frá Uzbekistan.
Jón Ingi var hins vegar nálægt sínu besta þegar hann mætti J.Perez frá Venezuela í fyrstu umferð í sínum þyngdarflokki og var viðureignin mjög jöfn og endaði 4-6 Perez í vil. Perez tapaði síðan með aðeins einu stigi, 5-6, fyrir heimsmeistaranum Diego Santana Vega frá Spáni.
Allan Busk, landsliðsþjálfari okkar, keppti einnig í opnum flokki og -75kg. flokki. Hann komst í aðra umferð í opna flokknum og í þriðju umferð í -75kg. flokknum. Daninn Thomas Bjuring vann til bronzverðlauna í +80kg. flokki en hann var meðal keppenda í landskeppninni við Dani sem fram fór í Borgarleikhúsinu í janúar sl.
Meðfylgjandi eru nokkrar myndir frá mótinu og ferð þeirra ásamt þjálfaranum, Lottu Berger, um Mexíkó. Á vef WKF (World Karate Federation), www.wkf.net, má finna öll úrslit frá mótinu.
|
 |
18.11.04
|
Edda og Jonni á HM í Mexíkó
Heimsmeistaramótið í Karate hófst í dag. Mótið er haldið á tveggja ára fresti og fer nú fram í Monterrey í Mexíkó. Íslenzka landsliðið á tvo keppendur á mótinu en það eru þau Edda Blöndal og Jón Ingi Þorvaldsson, bæði úr Karatefélaginu Þórshamri. Mótið stendur í fjóra daga og lýkur á sunnudagskvöld.
Á fimmtudag og föstudag fer fram keppni í kata og liðkeppni í bæði kumite og kata. Okkar fólk hefur síðan keppni á laugardag en þá keppa Edda og Jonni í opnum flokkum í kumite. Á sunnudag keppir Edda síðan í +60 kg. flokki og Jonni í -75kg. flokki í kumite.
Með þeim í för er Lotta Berger, þjálfari sænska kvennalandsliðsins, en hún heimsótti okkur nýlega og þjálfaði kumite-lið okkar síðustu dagana fyrir Íslandsmótið í kumite. Lotta hefur aðstoðað þau bæði mikið við undirbúning fyrir mótið og verður á hliðarlínunni hjá þeim um helgina en þess má geta að Allan Busk, landsliðsþjálfari okkar, er meðal keppenda og einmitt í sama þyngdarflokki og Jón Ingi.
Meðfylgjandi eru nokkrar myndir frá opnunarhátíð mótsins en hér munu birtast fleiri myndir og frekari fréttir að mótinu loknu.
|
|
8.11.04
|
Þórshamar er Íslandsmeistari félaga í kumite
Karatefélagið Þórshamar vann stórsigur á Íslandsmótinu í Kumite sem fram fór laugardaginn 6.nóv. Edda Blöndal varði Íslandsmeistaratitil sinn í +57kg. flokki og í opnum flokki vann hún sigur 11. árið í röð. Jón Ingi Þorvaldsson varð Íslandsmeistari í -80kg. og er það 10. árið í röð sem hann vinnur sinn þyngdarflokk.
Lið Þórshamars unnu einnig sigur bæði í liðakeppni karla og kvenna auk þess sem félagið vann Íslandsmeistaratitil félaga með yfirburðum.
Smellið á meðfylgjandi mynd til að skoða fleiri myndir frá mótinu auk samantektar á umfjöllun í sjónvarpsfréttum og helgarsportinu.
|
|
3.11.04
|
Foreldrafélagið hefur störf
Nú hefur verið valið í stjórn foreldrafélags Þórshamars. Fyrsti viðburður vetrarins verður jólakeila í Keiluhöllinni Mjódd þ. 12. des. Þá mæta börnin og unglingarnir í keilu og pizzu, skipulagt af foreldrafélaginu. Aðrar uppákomur eru í bígerð og verða auglýstar þegar nær dregur.
Í stjórn foreldrafélagsins eru þau Guðný Guðmundsdóttir, Jóna Ósk Pétursdóttir, Lárus Elíasson og Maria Helena Sarabia.
|
|
|
|
